Gentleman Farmer - මඩ නොගා ගත් ගොවියා සහ බිං ලිපේ කිරිබත්

ගිය සුමානේ අපි කුඹුරේ ගොයම් කපලා පෑගුවා.

අපි දෙන්නාට මාස දෙක තුනකට සෑහෙන්න කුරණි 12ක පොඩි කුඹුරක් තමයි මම වැඩ කරන්නේ. ඉන්දික වගේ  අඳේට දීලා නෙමෙයි මමමයි මේකේ ගොවියා.

හැබැයි ජෙන්ට්ල්මන් ගොවියා.

ඒ කියන්නේ මඩට බහින්නේ නැතුව, කොට කලිසමක් සහ ටී ෂර්ට් එකක් ඇඳගෙන, බූට්ස් එහෙම දාලා (සර්පයෝ කයි කියන බයට අප්පා),  ගොඩ ඉඳගෙන කුලියට ගොයියො ටිකක් අරගෙන තමයි මේ වැඩේ කරන්නේ මොකෝ මේ නහින දෙහින කාලේ ඕවා කරන්න තරම් හයිය හත්තිය අපිට නැති නිසා නෙවෙයි මඩ ගාගත්තොත් හෝදලා අරගෙන රජ කරයි කියලා හිතේ තියෙන බයටම.

ගිය කන්නේටනම් දෙහිඅත්තකංඩියෙන් ජයම්පතීට කියලා බිත්තර වී ගෙන්නගෙන, කීරි සම්බා වැපුරුවේ, ඒත් වැස්ස නැතුව පාලු උනා. යංතම් වී ගෝනි දෙකයි ගොඩ ගන්න ඇහැක් උනේ. 

ඒ නිසාම මේපාර දික්වැල්ලෙන්ම හොයාගත්තා ඇට දිග රතු හාලක්, වපුරන්නේ නැතුව පැල හිටෙව්වා. මොනා උනත් මේ මොණර නැලැයක් නිසා බොහොම් අමාරුවෙන් තමයි බැත බේරගත්තේ. උන් සෑහෙන්න පාලු කරලා තිබුනා.

  එකෙක් නෙමෙයි මොනරු 17 දෙනෙක් ඉන්නවා උඩ බංගලාව ගාව තියෙන කජු ගහේ රෑට. උන් තමයි උදේම පටන් අරන් හැන්දෑ වෙනකන් වී කරල් හූරන්නේ. කුරුඳු ගොබයක්වත් ඉතිරි කරන්නේ නැහැ, මොණරෙකුට ගලකින් ගහන්නවත් දෙන්නේ නෑ මේ ගමේ මිනිස්සු, කතරගම දෙයියන්ගේ වාහනේලුනේ.

මීට ඉස්සර ඒ කියන්නේ මම පොඩි කාලේ රත්නපුරේ ගොයම් කපලා මීහරක්ගෙන් කලාතයා, මුදුනා බැඳලා පාගන ගොයම් පෑගිල්ලාට වඩා වෙනස් දැන්.

ගොයම් කපන්න හැමදාම වත්තේ වැඩ කරන්න එන ගැහැනු අට දෙනයි මට ඇඹුල හදන්න උදව්වෙන්න පේමයි ඇර, සුදු අයියයි ධනරාජ්වයි කතා කරගත්තා ජයම්පතීටයි රාජටයි උදව්වට. 

සුදුමල්ලිගේ බූසිය ඉල්ලාගත්ත අත්ට්‍රැක්ටර් එකට හයිකරලා ගොයම් තලාගන්න. බූසිය කියන්නේ ඇග්‍රිමෙක් කොල මඩින යන්තරේට දන්දෙනිය පැත්තේ. වෙන එහෙකට නෙමෙයි.

මට ඕනි උනේ ඇඹුල හදන්න. උදේම නිල්වැල්ලේ ඉඳන් ගියා ඔක්කොම අඩුම කුඩුම අරන් දංදෙනියට. යනකොටත් ජයම්පතී බිං ලිප හාරනවා.

ජයම්පතිගේ බිං ලිප

කුරුඳු දර තමයි මමනම් පාවිචිච්කලේ

ඔය බිං ලිප දකුනේ පාවිච්චි කරන්නේ දොදොල් හැඳිගාන්න. තාච්චියේ හරි හට්ටියේ හරි වපසරියට ගැලපෙන්න පොලොවේ හාරා ගත්ත වලකට කානුවක් වගේ එක පැත්තට දිගට හාරගන්නවා දර ඇතුල්කරන්න. ඊට පස්සේ හට්ටිය පොලොව උඩ තියෙන ගැට්ට උඩ තියලා තැන් දෙකකින් විතර ගුල් දෙකක් හාරනවා ගිනි සහ දුම පිට වෙන්න. 

අලුත් මැටි හට්ට්ය මම ඊට ඉස්සරදා ඉඳන් වතුර දාලා පොඟෝලා තිබ්බේ. සුදු කැකුළු කිලෝ හතරක කිරි බතක් උයන එක ලේසි පාසු කෙලියක් නෙමෙයි, ඒ මදිවට බිං ලිපේ.

කුරුඳු දර තමයි මමනම් පාවිචිච්කලේ මොකෝ කුරුඳු තැලුවේ එපිටින් මාසේ නිසා. කුරුඳු දර වලින් ඉව්වාම හරිම රසයි හොඳ රස්නෙකුත් එන නිසා ඉක්මනට බත ඉදෙනවා...

කිරි උතුර උතුර බත ඉදෙනකොට බලන් ඉන්න ආසයි. 

  සෑහෙන දාංගලයක් දාලා ජීවිතේටම හදපු ලොකුම කිරිබත හැදුවා. 

මමනම් කෑවේ මෙච්චරයි

හොඳට උම්බලකඩ දාල රතුළුුනු කට්ට සම්බෝලෙකුත් ගලේ තලලා උඩහ මුර ගේ ගාව දෙහි ගහෙන් එවෙලෙම කඩපු දෙහි ගෙඩියක් දාලා ගත්තාම කොහොමද දන්නවද..

..දිව්‍යලෝක රසයි....

මේ දවාලට හදපු කෑම එක. මේක ගමේ විදියට නැතුව ටවුමේ විදියට හදන්න හිතුනා මොකෝ ගමේ මිනිස්සු හැමදාමත් කන දේවල් දීලත් වැඩක්නැති නිසා. ඒකට මට නම් හරිම දුකයි ගස් යට වැටී නාස්ති වෙන කොස් ගෙඩියක් කිරට හදලා කරෝල ටිකක් හෝ මිරිස් දාලා බැදලා කොහිල ඇඹුලක් එක්ක දුන්නනන් මොකෑ වෙන්නේ...

දොලහ එක වෙනකොට දවල්ට කාලා ආයෙත් පටන් ගත්තා බූසියෙන් වැඩේ කරන්න.

මොණරුන්ටයි, කුරුල්ලන්ටයි ගියාම ඉතින් අපිට ඉතිරි උනේ පොඩ්ඩයි...ඒත් මාර සංතෝසයි...

ඔක්කෝම වැඩ ටික ඉවර වෙලා ජයම්පතීට වී අව්වේ දාන්නය කියලා ඇවිත්......

 .........මෙන්න මෙතනට වෙලා,......

හොඳ හොට්වෝටර් ෂවර් එකක් එහෙම අරන්,

  කකුල් දෙක උඩ දාගෙන,

  VX ෂොට් එකක් දාලා,

 ඉඳිආප්ප ටිකක් කිරට හදපු අලුත් දැල්ලො හොද්දක් එක්ක ගිලලා,

 නිදාගත්තා මම නම්..

ඇයි 

ජෙන්ට්ල්මන් ෆාර්මර් නේ....