Monday, 20 May 2019

සරල තුමා



සරල ලේසිද...?

රේඛාවක් දෙපැත්තකට විහිදුනොත් අනන්තය දක්වා දිවෙනව වගේම එක තැනකින් පටන් අරන් එක පැත්තකට විතරක් විහිදුනොත් ඒකට රේඛාව කියන නමත් අහිමි වෙලා කිරණයක් වෙනව.

එතකොට සරල රේඛාවක් වෙන්නෙ ලක්ෂ දෙකක් යා කරන රේඛාවකට වෙන්න ඕනි. නිකන්ම නිකන් රේඛාවකට ඔහොම නං අපි සරල කියල හිතන් ඉන්න මේ හරිම සිම්පල් කියන අර්ථය හරිද අප්පා?

දෙයක් හරි සිම්පල් කියන එකයි කෙනෙක් හරි සරල විදියට ජීවත් වෙනව කියන එකයි සරලද..?
එයා හරි සිම්පල් විදියට අඳින්නේ කියල මාර්ක් සකර්බර්ග්ට අපි කියනව නේද..ඒත් පොර සිම්පල්ද නෑ මයෙහිතේ..මහ කොම්ප්ලෙක්ස් කේස් එකක් මෑන්ස්...!

මම වැඩිය හදාරල නැති ගෘහනිර්මාණ ශිල්පයේ සරල ඩිසයින් තමා කප් ගහන්නේ(ලු). ඒ උනාට සරල ඩිසයින් සරල විදියට කරන්න බෑ(ලු).. නිකන් උදාහරනෙකට අපි අපේ නිදහස් චතුරශ්‍රය ගන්නකෝ..ඒක හරි සිම්පල් බිල්ඩිමක් නේ..ඒ උනාට ඒක මහ කම්ප්ලෙක්ස් ඩිසයින් එකක් නේද..එහෙම කිව්වෙ ඒකෙන් අපේ රටේ ජාතීන්ගේ උරුමයන් වගේම සංස්කෘතික දායාදයන් අරව මේව වැගිරෙන්න ඩිසයින් කරන්නෙපැයි...අනික අර සිංහ මූණූ ලෝකල් සිංහද සියමෙ සිංහද චීනේ සිංහද අරව මේව කේස් එන්නැති නේද ඕක කරපු අයට...ඉතින් සිම්පල් නෑ...ඒක..!

හිතන්න, තාත්ත කෙනෙකුට සරල වෙන්න පුලුවන්ද..? ඒ කිව්වෙ මේ සරලව හිතන එක, අඳින එක, වැඩ කරන එක වගේ දේවලුයි ළමයි බමයි හදාගෙන උන්ව ලොකු මහත් කරල, රටට මොන හෙනේ ගහල තිබුනත් වෙලාවට කසාද බන්දල මගුල් තුලා හරි අගේට කරල ඉන්න කියන්න පුලුවන්ද සරලව හිටං...? එව්වා හරි කම්ප්ලෙක්ස් දේවල් නේ..ඒත් සරල තාත්තාල ඉන්නව කියල තමා දූල කියවනකොට ලියන්නේ...!

හරි..මේක තේරුම් ගන්න අපි ගමු හාමුදුරු කෙනෙක් උදාහරණෙට. උන්නාසේලා හෙන සිම්පල් විදියටනේ ඉන්නෝනයි කියල අපි හිතා ඉන්නේ...නිකන් හිතන්න කෑම ගැන...සිම්පල් මනුස්සයෙකුට කරන්නැහැකි දෙයක්ද උදේ 7.30ට විතර ඉස්තරම්ම ආකාරයේ බ්‍රෙක්ෆස්ට් එකක් අරන් ආයෙත් දවල් එකොලහමාර හතලිස්පහ විතර වෙනකොට පත ලන්ච් එකක් බස්සන්න..බෑනේ...කියන්නෙපා රෑට කන්නේනෑය කියලා...රෑට නොකෑවත් එක ලඟ අරම කන්න බෑ..ඉතින් කොහොමෙයි උන්නාසේලා සිම්පල් වෙන්නේ..බලන්නකෝ අර සිවුරෙම කොටු කොටු මැහුම් කීයක් තියෙනෝද කියල..ඒ සිවුරු පවා හෙන කම්ප්ලෙක්ස් මීනින්ග්ස් තියෙන දේවල්...ඉතින් සරල වෙන්නේ කොහොමද..?

සරල කියල දෙයක් නෑ..තිබුනත් දැන් ඒක රේප් කරලා කරලා නැති බංගස්තාන කරල තියෙන්නේ.. !

මෙහෙම හිතමු...ජනාධිපති කෙනෙකුට සරල වෙන්න පුලුවන්ද...ඒ කියන්නේ රටක් ජාතියක් සරල විදියට පාලනය කරන්න පුලුවන්ද ..මෙච්චර අලකලංචි වෙච්ච රටක්, පොඩි දූපතක් උනත් හෙන කම්ප්ලෙක්ස් ඉශූස් තිබ්බ තියෙන රටක්, ඒ මදිවට ස්ට්‍රැර්ටිජිකලි ලොකේට් වෙච්ච රටක්, පුලුවනිද සරලව පාලනය කරන්න..හරි රට පැත්තකින් තියමුකෝ..රටක් හැදෙන්නේ ගොඩාරියක් ග්‍රාමසේවක වසම් වල එකතුවකින්නේ, ඒ කියන්නේ පාලනය වෙන්න පුලුවන් යාන්ත්‍රනයක් එහෙම තියෙනවනේ..ඒත් ඔය ග්‍රාමසේවකට එන ඉශූස් පවා කම්ප්ලෙක්ස් මිසක් සිම්පල් ඒ කිව්වේ සරල නැහැ නේද...හරි අපි හිතමු ග්‍රාමසේවක තීන්දු තීරණ ගන්නව කියල හංදියේ කඩේදි මෙහෙම ඇහුනය, සුගුනා නාන තොටේදී අරහෙම කිව්වය, දෙවටේ ගහලා තිබ්බ කැලෑ පත්තරයක මෙහෙම තිබුනය කියල හිටං...සරලද ඒ ග්‍රාමසේවක නැහ්නං අඤ්ඤකොරොස්ද...?
අනේ මන්දා අඳබාල කමට සරල කියල හිතාගෙනද දන්නෙත් නෑ ඒ ග්‍රාමසේවක...නැද්ද....?

ජනාධිපති කෙනෙකුට සරල නොවී චාම් වෙන්න පුලුවන්...තමන්ගේ පදවියට සරිලන අයුරින් මොලෙන් තීරණ අරගෙන පොඩිකාලේ වෙලේ කුඹුරේ එහෙමනන් හැදුනේ වැඩුනේ හිටං, චාමෙට ජීවත්වෙන්න ඇහැකි ජනාධිපති කෙනෙකුට....එහෙමයි.....!


Tuesday, 7 May 2019

පාලුහිතෙනව.....!




පිලක් වගේ එකක්....!


මම ඉස්තෝප්පුවේ වාඩී වී සිටිමි.

ඉස්තෝප්පුව කියන්නේ පෘතුගීසි භාෂාවෙන් අපේ භාෂාවට එකතුවුන ලන්දේසි භාෂාවෙන් වැරෙන්ඩා ඒ කිව්වෙ  වැරෙන්දාව උන අපේ පිලට. අපේ මුතුන් මිත්තන්කාලේ ගෙවල් වල තිබුනේ පිලයි ඇතුල් කාමරයයි, ඉතින් පිලේ ගෙදර පිරිමියා නිදාගත්තා රෑට, දවල්ට ඉතින් ගෙදරට එන අමුත්තන් ඈඳි ගත්තේ පිලේ...හැබැයි දැන් කාලේ වැරෙන්ඩාවේ, එහෙමත් නැත්තං ඉස්තෝප්පුවෙ පිරිමියාට නිදාගන්න වෙන්නේ හතර ගාතෙන් ගෙදර ආවම, නැත්තං ඕන නැති වැඩක් කරලා විඳින දඬුවමක් විදියට.

අපේ මහගෙදරත් පිලක්, ම්....නෑ ඉස්තෝප්පුවක් තිබුනා අපි සුට්ටං කාලේ...ඒ උනාට අපේ අම්මගේ නොනවිතන ප්‍රොජෙක්ට් එකක් හැටියට ඒ ඉස්තෝප්පුව ඉස්සරහ සාලේ හැටියට වෙනස් උනා රොමියල් බාසුන්නැහේගෙ පිහිටෙන් ඒ කාලෙදි...!

ඔය ඉස්තෝප්පුවටම අල්ලලා තිබුනා කාමරයක්, ඒකට කිව්වේ ඉස්තෝප්පු කාමරේ කියලා. ඒකේ තිබුන වැදගත්කම තමා රෑට ප්‍රයිවට් එනට්‍රන්ස් එකක් තියෙන එක ගෙදර අයට නොදැනෙන්න එන්න යන්න පුලුවන්වෙන. අනිත් වැදගත්කම තමා ඉතින් පිට කවුරු හරි රෑ නවතිනවනං සම්පූර්ණ ප්‍රිවසි සමග ඒ කාමරේ ඉන්න ඇහැක් කම. ඔය අපේ ඉස්තෝප්පුවෙ හරි මැදට වෙන්න තිබුනා ලස්සන ලංදේසි පන්නේ ලී කනුවකුත්. ඇයි එක කනුවක් කියන එක තාම නොතෙරේ, සමහර විට ගේ හැදුවෙ අපේ ආතා නිසා හිතන්න ඇති  ඔච්චර මක්කටැයි වියදං කරන්නේ, රණසිංහට එක කනුවක් මදෑ කියලා...ඒ නිසාම කනුව හිටවන්නැති හරි මැදින්, එතකොට යටලීය සපොර්ට් වෙනවනේ ඉතින් හරි සමානව.

කොහොමෙන් කොහොම හරි අපේ අම්මගෙ ප්‍රොජෙක්ට් එකෙන් පස්සෙ අර ඉස්තෝප්පු කාමරේ නමත් වෙනස් උනා ඉස්සරහා කාමරේ කියලා...ඒ කාමරේ හම්බෙන්නේ පවුලේ ලොකුලමයට. ඒ කියන්නේ ඇල්ලෙ වලේ එහා කොනට එක දිගට පීනන්න පුලුවන් වෙන වයසේ ඉන්න ගෙදර පිරිමි ලම‍යට. කටුගස් ඇල්ලේ ඇල්ලවලේ පීනන්න ඉස්සරවෙලා රවුම්වලේ, දික්වලේ, කලුවලේ, වැලි වලේ එහෙම පීනලා පන්නරේ ගන්න ඕනි. ඒක වයසත් එක්ක ඉබේම හම්බුන පන්නරයක්. ඇල්ලවලේ පීනන්න පුලුවන් වෙනකොට හොඳ පීනුම් කරුවෙක් වගේම කිමිදෙන්නෙක් සහ ඒලෙවල් කරන කොලු ගැටයෙක්, ඉතින් ඉස්සරහා කාමරේට සංක්‍රමණය වෙන එක තමා ගෙදරින් එලියට පැන්නෙන පළවෙනි සළකුණ.

ඉස්සරහා කාමරේ, නැත්තං ඉස්තෝප්පු කාමරෙන් අපේ ගෙදර අයනං, කාලයාගේ ඇවෑමෙන්,  විශ්වවිද්‍යාලෙ බෝඩිං කාමරේට සහ වෙනත් කාමර වලට සංක්‍රමණය උනා. ඒකට දොරක් තිබුනාට ඒක වහනව නං මං දැකලා නෑ. දෙපැත්තේ පිත්තල හුක්ස් තියෙන කේබල් එකකින් එල්ලපු දොර රෙද්දක් තමා ප්‍රිවසි වලට තිබුනේ...ඒ නිසා වෙන්නැති ඒ කාමරෙන් ඊලඟට විශ්වවිද්‍යාලේ බෝඩිං කාමර වලට එහෙම අපිව විසි වෙන්නැත්තේ..අම්ම හිතලම දොර වහන්නෙ නැතුව ඇති අපිව ගෙදරින් එලෝගන්න.

ඔය ඉස්තෝප්පුව තිබුන කාලේ අපේ ගෙදර තාප්ප්යක් තිබුනේ නෑනේ. අඩි දෙකක් විතර උස අන්දර වැටක් තිබුනේ..ඉතින් පාරේ යන එන වත්තේ වැඩ කරන තංගච්චිලයි රෙංගාලයි, හරක් අරන් යන හරක් පොඩි මහත්තයයි වත්තේ ලියන මහත්තයයි ටී මේකර් මහත්තයයි, හුසේන් ඩ්‍රෙෆරි ස්ටොර්ස් එකේ වැඩ කරන අහමඩ් එක්කයි ගෙදර ඉන්නවනං අපේ තාත්තා ඉතින් වාසදේස කථා කරනවා. මුරුගාට, ඒ කිව්වේ ඇවිදින බාබර්ට  කියලා අඹ ගහ යට බංකුවක් තියාගෙන කොණ්ඩේ රැවුල බා ගැනිල්ලත් උනේ ඔය තාප්ප එන්න කලියෙන්.

අපේ අම්මගේ නොනවතින ප්‍රොජෙක්ට්ස් පටන් ගත්තේ 77 ජේ ආර් ගේ විවෘත ආර්ථිකේ එක්ක. ගෙදරට බ්ලොක් ගල් අච්චුවක් අරගත්තා. ඒකෙන් හදපු බ්ලොක් ගල් වලින් ඉස්තෝප්පුව, ඉස්සරහ කෑල්ල කලා, ඉස්තෝප්පු කාමරේ, ඉස්සරහා කාමරේ කරල නැවුතුන නැති මේ ප්‍රොජෙක්ට්ස්, අන්දර වැට, මැද උස කොටු තියෙන ලස්සන බ්ලොග් ගල් තාප්පයක් කරලා, කඩුල්ලේ තිබ්බ උණ ලී තුන අරන් දාලා කොටු කොටු දැල් තියෙන නිල් පාට යකඩ ගේට්ටුවකුත් දැම්මා. ඊට පස්සේ ඉතින් අපේ තාත්තා බෝම අමාරුවෙන් අර ගේට්ටුවෙ එල්ලිලා තමා රෙංගලා අහමඩ්ලා එක්ක චැට් කලේ ගෙදර ඉන්නදාට. පව්.....!

එහෙම උනා කියලා තාත්තගේ සහජීවනේ, (එයා ඔව්ව දන්නේ නෑ, ඒ කාලේ ඕම වචනයක්වත් තියෙන්න නැතුව ඇති ඇත්තටම), නවැත්තුවේ නෑ, රෙංගලා අහමඩ්ලා තාත්තා එක්කත්, තාත්තා ඒගොල්ලෝ එක්කත් ඉතින් කථාබහ කොලා, කෑවා බිව්වා, මගුල්තුලාවලට ආවාගියා.

ඊට පස්සේ ඕන් 13ක් මැරුනය කියල කෝලහලේ පටන් ගත්තා. ඒ එක්කම යුද්ධෙ ආවා. තාත්තා ඊට පස්සේ රෙංගලා තංගච්චිලා ගේ ඉස්සරහින් යනකොට කථාබහ කලාට හරි හෝදිසියෙන් හිටියා එයාලගේ ගමන් බිමන් වැඩකටයුතු ගැන. විශ්වාස කලේ නෑ ඉතින් ඒ අයව. සම්බන්ධෙ කථාබහට විතරක් සීමා උනා. ටීවී එකේ නිතරම කිව්වට ඔක්කොම රෙංගලා ත්‍රස්තයො නෙවීය කියලා, ඒවා වැල් බයිල නේදැයි කියල වගේ තමා ඉතින් වැඩ කටයුතු කලේ. 

ඊට පස්සේ ඕන් සැටලයිට් ආවා (අපේ තාත්තාට සැටලයිට් නෝනවනං ඇල්ලුවේම නෑ, එයා පරක්කු වෙනව මදියට ගල් පැලෙන ගොන් බොරුත් කිව්වය කියල තමා ඒ..) එයා ඉතින් සාමය කිව්වට මොනාවත් ගෙනාවෙම නෑ කියල එයාව යැව්ව කියමුකෝ...!

එයා ගිහින් තව කාලයක් යනකන් අපේ තාත්තා ටීවී බැලිල්ල නැවැත්තුවා, ටීවී එකේ එක දිගටම උඩු රැවුල්කාර මහින්ද පෙන්නනවය කියලා....තුක් විතරක් කියලා පඩික්කමට කෙළගහනව ටීවී එකේ මහින්දව පේනකොට ඉතින්. 

කොහොමහරි ඕන් යුද්ධ නැවතිලා, මහින්ද ආයෙත් ආවාම අපිත් ආවනේ ඉතින් තාත්තලා එක්ක මෙහෙ ඉන්න..හිටිය තමා....ආප්ප කේස් එකක් ගිහින් අම්බානකට දෝරෙගලන්න හම්බුනා ප්‍රජාතන්ත්‍රවාදේ..ඇත්තටම ඒරොප්පෙත් නැති නිදහසක් නෙව වින්දේ 21 වෙනිදා වෙනකන්.....!


මම ඉස්තෝප්පුවේ වාඩී වී සිටිමි.

තාප්ප නැත..එව්වා ගලවලාය...ඒ නිසා ගේට්ටුත් නැත....මහගෙදර වගේ නෙවෙයි මගේ ගෙදර ඉස්තෝප්පුව තියෙන්නේ ගඟක් දිහා බලාගෙන...ඈත දුමාරයක් නැගෙන්නේ දෙමටගොඩ සමන්තා හෝල් එක පැත්තෙන්...ගඟට එහායින් තියෙන්නේ දෙමටගොඩ, කොලොන්නාව....අද ජසීමා ආවෙත් නෑ ගේ අතුගාගන්න...ආයෙ ඒවිද දන්නේත් නෑ...එ මනුස්සයා ඉන්නෙත් දෙමටගොඩ...!

විහාරමහා දේවී පාර්ක් එක වටේ තිබුන අසාද් සාලි ගහපු යකඩ වැට ගලෝලා කොහේද දන්නේ නෑ යූඩීඒ එකේ ඈයෝ ගෙනිච්චේ...ඔව්ව දැන් ආයෙත් ඕනිවේවි...අපිට වැටවල් තාප්ප ගේට්ටු නැතුව අවුරුදු දහයකට වඩා ඉන්න බෑ..!

පාලුහිතෙනව.....!





Saturday, 16 March 2019

මා බඹරිඳු ....!



මා බඹරිඳු හරින ගිමන්
නටුවට වී ඔබ මල
රඟනා රිසිසේ පිනවන දෙනුවන්

පියඹන අත්තටු ලද සමනළ රෑන
මල හා කරනා ඉඟි බිඟි
ඇස් කොනකින් බලා
සුසුම් හෙලනා
මා බඹරිඳු හරින ගිමන්

මල ඉරටත් හොරෙන්
අඩවන් දෑසින් කරනා ඉඟි බිඟි
ඉවසන
මා බඹරිඳු හරින ගිමන්....!





Tuesday, 19 February 2019

A Life Style....!


A Life Style....! 


 අක්කි ගාපු පොල් 
දික්වැල්ලේ පොලෙන් ගත්ත අගුණකොළපැලැස්සේ හාල්
 එක්ක අඹරලා වැලේ තිබුන ලොකු පුහුලෙන් 
පලුවක් ඉව්ව 


 ඇඹුල් කෙසෙල් මුවක් කඩලා
 කොස් ඇට තුන හතරක් තලලා
 තෙලෙන් ලිප තියල  
මිටි කිරෙන් ඉව්ව 


 කිලෝව අනූවයි වැලිමඩ අල 
තම්බලා හොඳට උම්බලකඩ දාලා
 කිලෝ එක හැත්තෑවේ ලොකු ලූනු දාපු
 අල බැදුම ඉව්ව 


 ඔයා කන්න ආසා කප් පරිප්පු 
දැන් කොටා ගත්ත 
අලුත් තුනපහ 
යහමින් දාලා ඉව්ව


 ලපටි දඹල කඩනකොට 
මට කට කොනකින් හිනාගියේ
 අදත් දඹල සම්බෝලද කියල
 අහනව නේද කියල හිතිලා
 ඒ උනාට රතුලූනු පොල් යහමින් දාලා
 දඹල සම්බෝලේත් හැදුව 


 රතුහාල්ද සුදුහාල්ද ලිපේ තියන්නේ....!   

Monday, 11 February 2019

මරණීය දණ්ඩනය






කුලගෙයෙහි

කැණිමඩලට

ඔබම තැබූ ගිණි 

නිවන්නට තැත් දැරූ මාහට 

ඔබෙන් ලැබුන තුටුපඬුර නම් 

ප්‍රේමයේ උල මත සිඳුවා

වියපත් මගේ ආත්මය

මරණීය දණ්ඩනයට ලක් කිරීම‍යි!    







Friday, 18 January 2019

දුම් රස හාදු













දුම් රස හාදු

අවුරුදුම තිස්පහක්
මා හද බැඳි ඔබ
හීනෙකින්වත් නොහිතූ වෙලාවක
මුවාවී   කැස්සක
සැඟවී හෙම්බිරිස්සාවක 
අතුරුඳන් උනේ ගිය උඳුවප් මහේ

අන්තිම කාටුනය ලාච්චුවේ
අන්තිම පැකැට්ටුව මේසය උඩ
ලයිටර් ගිනිපෙට්ටි ක්‍රෝධයෙන් 
අහක බලන්

හදිසියේම නින්දෙන් පිබිදෙන 
හීනයකින් පියවි සිහිය ලබන
කකුල පැටලී බිම වැටුන
සේ දැනෙනා විට
ඔබ කොහේද ගිහින් 
දුමාරයේ සුවඳවත් නොතියා මා මුව....
දුම් රස හාදුවලට 
පෙම්බැඳි
කුමරිය සේ...!

Monday, 24 September 2018

පිලේ පැදුර...!




ඉරිතලා හඬනා පොළොවට
ඇදවැටෙන්න  මෝරන අර වැහිවලාවට
ඉඩදෙන්නටමදෝ  හැංගෙන්නේ
හිරු අද හැන්දෑවට


පාළොස්වක වඩම්මන්න මෝරන හඳට
ඉඩදෙන්නටමදෝ නිවෙන්නේ
අද අර තරුකැට

හිතේ කහටක් නෑ කියපු අලුගේත්තුරු කථාවලට
ගිරීස්මෙත් ඉවරවේවි හෙටානිද්දාට
කලියෙන් පහුවෙන්නට පාළොස්වක
වහීවි මුරුගසන් වරුසා අප පෙම හේදෙන්නට



හිතුවට පැතුවට මගේමයි කියා හේනක්වත් නැතිකොට
බොරු කියන්නේ මොකට
කොහොමත් එකයි දැන්නං මට



ආඩම්බර කං බෑ නොව තම්බන් කන්නට
හිතුවනං නැවතිලා පෙර පනින්නට
හංගාගෙන හිටියා නොව මං
මහමෙරක් වන් ආලයක් තිට පුදන්නට



තාමත් පිලේ පැදුරෙන් හමන්නේ නුඹේ පුසුඹ
පැල පුරාම මැවෙන්නේ නුඹේ කොමල හිනාව
ගැටපිච්ච පඳුරේ මල් පිරිලා ඉනාව
තුරුල්වෙන්න එනවානේද හෙටානිද්දා නොපමාව


~~~~~~