Friday, 19 May 2017

ඈ ලියූ කව....!



මතක වළසා
පහුරු ගෑ
හදවත
අවුළුවා
ගලනා විට
රුදුරු සෙනහසේ
රුහිරු මතකයන්

සැරසී සුදුවතින් 
 මා හිත
 ගියා
මළගම්
ආදරේ නුඹටම තියා...!

Sunday, 7 May 2017

පාලු සිත...!


 Chrys Roboras

වියැලුන මා
කවි සිත
තෙමනු බැරිය
සොඳුරියෙ
ඔබැ
ආදරණීය
මුරුගසං වරුසාවට....!

එයනම්
මේ කවිසිත
කල නොවැරැද්දක් බැව්
කෙසේ පසක් කරමුද
අප....!!!




Thursday, 6 April 2017

පන්නරය - 2 - Kent Nelson



පන්නරය - 1 ලිව්වේ මීට කලියෙන්...!

පීටර් සැමන්ස් මට දිගටම අංචි ඇද්දාය කිව්වොත් නිවරදියි...ඔහුට මගේ ස්වාධීනත්වය ප්‍රශ්නයක් වෙන්න ඇති..ඒ කිව්වේ, අනිත් සියලුම ගෘහනිර්මාන ශිල්පීන් සහ සැලසුම් ශිල්පීන්, එවකට කොවි (COWI) සමාගම උපදේශණ කාර්‍යයන් වල නියුතු ඕමානයේ මහබැංකු ගොඩනැගිල්ලේ වැඩ කටයුතු වල නියත වූයේ ඔහුගේ අනසක යටතේ වුවද මා හට ලබාදී තිබුන කාර්‍යය වු, පෙට්‍රෝලියම් ඩිවෙලොප්මන්ට් ඕමාන් (PDO) සමාගමේ කැසිකැසල පුලුස්සා චක්‍රීයකරණය කිරීමේ ඒකකය සඳහා ගොඩනැගිය යුතු ගොඩනැගිල්ල නිර්මානය කිරීම මා හට තනියමම කිරීමට මාකෝ ගත් තීරණය  (100% ක ස්වාධීනත්වයක් ලබාදීම) ඔහුට ප්‍රශ්නයක් වීම විය යුතුය..!

Award winning design of Oman Central Bank building by Archt. Ole B Larsen


ඇත්තටම COWI ප්‍රධාන ගෘහ නිර්මාණ ශිල්පියා වූයේ Ole B Larsen මහතාය. එනමුදු මා එම සමාගමට එක්වූ කාලයේ ඔහු කෙටි බිස්නස් වීසා උඩ, ඉඳ හිට ගෙන්වාගෙන වැඩ කරගැනීම තමා කම්පැනි පොලිසි එක වෙලා තිබුනේ..එයට හේතුව ඔහුගේ අධික වේතනය..නමුත් එයින් පීටර් ලොකු ගැම්මක් අරගෙන අනිත් අයට ලොක්කා චරිතය රඟපෑ බැව් මම දනිමි.


පීඩීඕ සමාගමේ ගොඩනැගිලි, එම සමාගම විසින් එකලස් කර ඇති නියාමයන් ආස්‍රයෙන් නිර්මාණය කලයුතුය...එම නියාමයන් ගැන හොඳ දැනුමක් සේම, ඒවා අඩංගු ග්‍රන්ථ ඩග්ලස් ලෑන්ග්මේය්ඩ් අත තිබුනද, ඕස්ටේර්ලියානු ජාතික ඩග්ලස්, පීටර්ගේ කීම අසා මුලදී ඒවා මා හට පරිශීලනය කිරිමට ඇති මං ඇසුරුවත්, වෙනත් මාර්ගයකින්, එනම් මා හඳුනන ඉන්දියන් ජාතික ගෘහ නිර්මාන ශිල්පියෙකුගේ මාර්ගයෙන් එම නියාමයන් ගෙන්වාගෙන, මා සෙමින් දැහැමින් වැඩකටයුතු කරගෙන ගියෙමි.

එසේ දැහැමින් සෙමින් වැඩ කිරීමට නිර්භීත කමත් පන්නරයත්  මට ලැබුනේ, ඕමාන් වලට එන්න කලියෙන් සවුදි අරාබියාවෙ ගත කල මාස දහතුනේදී , මා ලැබුවාවු පන්නරයක් ඇත්නම්, එම පන්නරයේ ප්‍රධාන භූමිකාවක් රඟ දැක්වු, කෙන්ට් නෙල්සන් (Kent Nelson ) නම්වු ඒ සොඳුරු ඇමෙරිකානු ජාතික ගෘහනිර්මාණ ශිල්පියාගෙන් යැයි ලියා තබන්නේ ඉමහත් ආදරෙයෙනි.

කෙන්ට් මට හමුවෙන්නේ 1991 ජූනි මාසේ විතර (මට මතක හැටියට ). ඒ වන විට මා සේවය කලේ අල්කෝබාර් වල කන්සල්ටින් ඇන්ඩ් ඩිසයින් ඉංජිනියරින් (CDE) කියන සමාගමේ. එහි ගෘහනිර්මාන ශිල්පීන් ලෙස එවකට සේවය කලේ පිලිපීන ජාතික ජිල්, බ්‍රිතාන්‍ය ජාතික ටෙඩ් සහ මම...!

al-khobar at night

කෙන්ට් මට වඩා අවුරුදු විසිපහක් විතර වයසයි මට හම්බවෙනකොට...කෙන්ට් එතකොට ඩිවෝස් වෙලා හිටියේ..එක දුවක් හිටියා... දුවගේ නම ට්වයිලා උනාට ( Twyla) ට්වයි ට්වයි (TWY TWY) කියලා දුවට කෙන්ට් කියන්නේ,  ..කෙන්ට් ගොඩාක් වෙලාවට වැඩ කරලා තියෙන්නේ එයාගේ ගෙදරින් පිට ප්‍රාන්ත වල හරි පිටරට වල් වල හරි..එයා එක්ස්පැට් කෙනෙක් හැටියටම තමයි ජීවිතේ ගෙවන්න පුරුදු වෙලා තියෙන්නේ...එයා හවායි වල වැඩ කරලා නිවාඩුවකට ගෙදර ආපු වෙලාවක ඇදුම් බෑග් එකේ කාන්තා යට ඇඳුමක් තිබිලා බිරිඳ කියලා ඒඩ්ස් ටෙස්ට් එකක් කරන්නය කියලා..ඒ ආර්ගියුමන්ට් එක දුර දිග ගිහින් ඩිවෝස් වෙලා තියෙන්නේ.

හැබැයි කෙන්ට් මට නං කිව්වේ ඒ කාන්තා යට ඇඳුම එයා ගේ නැගනියට ගෙනා තෑග්ගක් බව...හි හි හි....!

කොහොම හරි 1996 ජුලි 17 වෙනිදා ඇමෙරිකාවෙ ඩලාස් එයාපොර්ට් එකෙන් ගුවන්ගත වෙන කොට කඩා වැටුන හෝ මිසයිලයක් මගින් බිම හෙලපු TWA Flight 800 යානයේ හිටපු ට්වයි ට්වයි අම්මත් එක්ක යුරෝපයේ ඩිස්නිලන්තයට නිවාඩු යන ගමන් මගියන් හැටියට මියපරලොව ගියා..කෙන්ට් එතකොටත් සවුදි අරාබියේ වැඩ කලේ..මම හිටියේ ඕමාන් වල...ඒ මොහොතේ මම කෙන්ට්ව දවස් දහයකට ඕමාන් වලට ගෙන්න ගෙන බලා කියාගත්තා හැටි තාම මතකයි..කරුමේ කියන්නේ, ට්වයි ට්වයිගේ අම්මා, TWA ගුවන් සමාගමේ හිටපු ගුවන් සේවිකාවක් වීම...

කෙන්ට් මට ;

  • පැරලල් පාකින් කරනාකාරය, 
  • පාටියකදි ගෑල්ලමෙක්ව අල්ලගන්නාකාරය, 
  • ප්ලාස්ටික් ලෙඩ් පැන්සල්වලින් මයිලර් පේපරේක ඩ්‍රෝවින්ග් අඳිනාකාරය, 
  • පිහියෙන් ගෑරුප්පුවෙන් කෑම කනාකාරය, 
  • පෙප්සි ටින් එකක ගැට්ට තලලා හෂීශ් උරනාකාරය 
ආදී ජීවිතයේ සෑම පැතිකඩක්ම ගුරුමුශ්ටි නැතුව කියල දුන්න හැටි මතක් වෙනකොට හරිම සොඳුරුයි මගේ හිත...!

කෙන්ට්ට හරි ප්‍රශ්නයක් තිබුනා එයාගේ හැඩරුව ගැන...එයාර්ලයින් වල එයාහොස්ටර්ස්ලාගෙන් හරි උදව් තිබුනා මෑන්ස්ට ඒ නිසා.. හේතුව කෙන්ට් හරියටම ප්‍රසිද්ධ හොලිවුඩ් නළු ග්‍රෙගරි හයින්ස්ගේ කපාපු පලුව..කොච්චර කිව්වත් විශ්වාස කරන්නේ නෑලු එයානෙවෙයි කියලා..ඉතින් ෆල්යිට් එකේ මැනිපෙස්ටො එක බලන්න කියලලු බේරෙන්නේ..ඒ කරන්නෙත් බඩ පිරෙනකන් බියර් එහෙම සප්පායම් උනාට පස්සෙලු...!

කෙන්ට් මට ඒ දවස්වල ඉඳලාම කියන දෙයක් තමයි.... R2LA (අටූලා) යෝ මෑන්..යූ හෑව් ටු ලුක් ආෆ්ටෙර් යූ මෑන්...කම් ටු ජිම් විත් මී..කියලා...කොහෙද තාමත් බැරි උනා නෙව ඒක නම් අහන්න...!

Gregory Hines - Kent Nelson Look aLike

කෙන්ට් මට කිව්වේ R2LA...කියලා.. ඇමරිකන් ඇක්සන්ට් එකෙන් මගේ නම කියවෙන්නේ එහෙම..මට පස්සේ කාලේ ඊමේල් එව්වෙත් R2LA කියලා...ඊමේල් වල මාව ඇමතුවේ R2LA the Great කියලා...!



අපි කවුරුත් දන්නවා සවුදිඅරාබිය මත්පැන් තහනම්, කාන්තාවන්ට මූන ආවරනය කලයුතු වගේ මිනිස් අයිතිවාසිකම් නැති රටක්ය කියලා..රටක් නෙවෙයි ඇත්තටම අපායක්..මේ අපායේ තිබුනා ක්ෂේම භූමියකුත්..එකට කියන්නේ ඇරම්කෝ සීනියර් කෑම්ප් කියලා දහරාන්වල තිබුන...මත්පැන්හල් නැති නිසාත්, නොදන්න දේවල් කරලා ජීවිත හානි කරගන්න නිසාත්, ඇරැම්කෝ සීනියර් කෑම්ප් එකේ ඉන්න ඈයින්ට රටට එනකොටම මත්පැන් ගෙදරදිම පෙරාගන්න අවශ්‍ය උපකරණ මෙවලම් ටිකක් දෙනවා ඇරැම්කෝ එකෙන්ම...සීනියර් කෑම්ප් එකේ ගේට්ටුවෙන් ඇතුලේ තිබුනේ ඇමරිකාව..ගේට්ටුවෙන් මෙහා ලෝකයේ / අපායේ කරන්න බැරි වැඩ ඒ කිව්වේ කාන්තාවන්ට කොටගවුමක් කලිසමක් ඇඳගෙන එහේ මෙහේ යෑම, වාහනයක් එලවීම වගේම ගෑනු පිරිමි දෙන්නෙකුට කැෂුවල් සෙක්ස් කිරීම දක්වා නිදහසක් ගේට්ටුවෙන් එහා ලෝකයේ තිබුනා..!

ඉතිං හැම සුමානෙම මට කෙන්ට් 200 පෲෆ් ඉස්පිරිට් ගෙනල්ලා දුන්නා..වතුර වගේ නිසා ෆ්‍රිජ් එකේ දාගෙන පෙප්සි යහමින් දැම්මාම රම් පරාදයි...කෙන්ට් හම්බවෙනකන් පියුජොට් (එහෙමයි පර්ජෝ එකට එහේ ලංකාවෙ බුවාලා කිව්වේ) නිහාල්ගේ තනූෆ් බෝතල්වල පුරෝපු කසිප්පු බීපු මට කෙන්ට් දෙයියෙක් උනා...අර අපිලට අඹ පොවපු ඉයන් වගේ..!
aerial view of aramco camp 

කෙන්ට් එක සති අන්තෙක කථා කලා මටත් අපායෙන් එහා ලෝකය බලලා, වයින් වීදුරුවක්, බියර් එකක්, විස්කි වඩියක් ගහලා පිලිපීන ගෑල්ලමෙක් එහෙම ආස්‍රය කරලා එන්න...මමත් ඉතින් කෙන්ට්ගේ වාහනේ නැගලා ගියා ඇරැම්කෝ සීනියර් කෑම්ප් එකට....!

එ ගමනේ විස්තරය බලධරයා විසින් කපාහරින ලදි...! සොරි වෙන්න ඕනෑ...!

හැබැයි ඒ ගමනෙන් මම හොඳ පාඩමක් ඉගෙනගත්තා ජීවිතයට...ඒක තමයි තමන්ට යම්කිසිදෙයක් අවශ්‍යනම්, පැකිලෙන්නෙ නැතුව ඒ දෙය ලබාගැනීමට දහිරියෙන් ක්‍රියාකළ යුතුබව...මගේ කුලෑටි කම, ඒ කියන්නේ ගමේ ගතිය..අර කොහේ හරි ගෙදරකට ගියාම අපි කියන්නේ නිකන් ඇවිල්ලා යන්න ආවාය කියල එහෙම වගේ ගතිය...අන්න ඒ ග්‍රාම්‍ය ගතිය මග ඇරගන්න අත්පොත් තැබුවේ එහෙම නැත්තං පන්නරය එහෙම ලැබුවේ එදා වෙන්න ඕනි...තේරෙන්න ඇති නේ මොකක්ද ඉතිං වෙන්න ඇත්තේ කියලා....!

කොහොම හරි ආපහු එනගමන් බඩපිරෙන්න ඉංගිරිසියෙන් බැනුම්නං ඇහුවා කෙන්ට්ගෙන් මං.....!


ආපහු PDO Waste Recycling ව්‍යාපෘතියට හැරෙමුකෝ...මට සාමාන්‍යයෙන් කාලය කළමනාකරනය නිසි අයුරින් කරගන්න පුලුවන්, නමුත් ආකිටෙක්ට්ස්ලා හුඟදෙනෙකුට අඩුවෙන්ම පවතින ගුනයක් එය. තවත් දෙයක් තමයි මට තනියෙන්ම මුලු ප්‍රොජෙක්ට් එකකම ඩ්‍රෝවින්ග්ස් උනත් කරගන්න පුලුවන්. සාමාන්‍යයෙන් ආකිටෙක්ට්ස්ලා සම්ප්‍රදායිකව ඩ්‍රාප්ට්ස්මන්ලට කියල තමයි ඩ්‍රෝවින්ග්ස් කරගන්නේ..මට ඔය Co-pilot වැඩේ අල්ලන්නෙම නෑ..එක්කෝ මම ඇන්දා නැත්තං නිකා හිටිය..හැබැයි ඒ චන්ඩිකං පොඩි ප්‍රොජෙක්ට්ස් වලට විතරයි.

මාස තුන ඉවරවෙනකොට මම තනියම මුලු ප්‍රොජෙක්ට් එකේම ඩ්‍රෝවින්ග්ස් ටිකත් අනෙකුත් ලියවිලිත් ඉවර කලාට, ඕස්ට්‍රේලියානු ජාතික ගෘහනිර්මාණ ශිල්පියා වූ ඩග්ලස් මට ලොකු උදව්වක් කලා වැහි වතුර බැසයෑමේ කානු පද්ධතිය (Surface and Storm Water Drainage System) නිර්මාණය කිරීමට, හේතුව ඒ වෙනකොට මට ඒ ගැන කිසිම දැනීමක් නොතිබීම...!

අර්වින් කොච්චර සන්තෝස උනාද කිව්වොත් හැමෝටම කියනවා ඇහුනා ඒටීආර් තමයි මමදැක්ක එකම ආකිටෙක්ට් වෙලාවට ප්‍රොජෙක්ට් එකක් ඉවර කරපු කියලා..(මගේ නම ඒටීආර් උනා ඒ අවුරුදු 23 දීම)
ඒකට මගේ උත්තරේ උනේ අර්වින් තාම ලා බාල ඉන්ජිනෙරුවෙක් නිසා වැඩිය ආකිටෙක්ට්ස්ලා එක්ක වැඩ කරලා නෑය කියන එකයි.

කොහෙමෙන් කොහොම හරි, අර්වින් ගෙයි මගෙයි වෘත්තීයමය බැඳීම, ඒ සුබවාදී ආරම්භය නිසා තවත් වසර විස්සක් ඉස්සරහා දක්වාත්, අදත් එලෙසෙම පවතිනවා...ඒකට තමයි අර ෆර්ස්ට් ඉම්ප්‍රෙෂන් ඉස් වෙරි ඉම්පෝර්ටන්ට් කියන්නේ මයේ හිතේ..

මාසතුනෙන් නිවාඩු ඉවර වෙලා එනවා කිව්ව ලොක්ක ආවාම වෙච්ච දෙයින් ඉගෙනගත්ත පාඩම ඊලඟට....!


Monday, 3 April 2017

පන්නරය - 01

ජීවිත අත්දැකීම් රාක්කෙක එකතු කලාම මෙහෙම පෙනේවිද...?


සමාව ඉල්ලන්නේ ආදරෙන්..!

හේතුව මා මෙය ලියා තැබිය යුතු උනත්, තේරුම් ගන්න, ඒ කිව්වේ මේ ලියන දෙයින් කාටද වැඩක් වෙන්නේ කියන එක මටත් ප්‍රහේලිකාවක් නිසා...!

මම නැගිටලා තියෙන්නේ, ඒ කිව්වේ ජීවිතේ...කවුරු හරි හිතාමතා මාව වැට්ටුව වෙලාවල් වලය කියන එක දන්නේ මමම විතරක් නිසාත්...මේ ලියන දෙය තේරුම් ගැනීම මාව හොඳට දන්න අයට විතරක් පැහැදිලිවෙන දෙයක් නිසාත්..මේ තවත් කථාවක් විතරක් නොවේවා..නැත්තං ජීවිතේ හරි අසාධාරණයි....!

ඉතිං අවසර....!

1991 මම මෙරටින් පිට උනේ කිසිම අත්දැකීමක්..(ඒ කිව්වේ ජීවිතේ..) නැති කෙනෙක් විදියට යංතං 31ක් උනාම...ඒ උනාට අද 31ක් වෙන අය මීට දශක දෙකකට එහා ජීවත් උන උදවිය වගේ ලාමක නෑ අත්දැකීම් වලින්, හේතුව අද ලෝකේ ගොඩාක් කිට්ටු නිසා අප හැමෝටම.. ඉතින් සාවධානව අසා සිටිවිය කියලයි හිතන්නේ..!

මම විප්‍රවාසයේ පලමුවෙනි අවුරුදු දෙක තුන ගෙව්වේ මදු වැලක් වගේ..ඔහේ ලඟ තියෙන ගහක, අත්තක වෙලිලා යන්න ඇරියා ජීවිතේ, කොහෙද මොනාද කවදාද කියලා නොදැනගෙන හිටි නිසා වෙන්නෝන....!

අවුරුදු තුන ගෙවෙන්නේ 1994 ජුනි මාසේ 12 වෙනිදානන්, 11 වෙනිදා එනවා දුරකථන ඇමතුමක් ඩෙන්මාර්කයේ ප්‍රසිද්ධ ඉංජිනේරු සමාගමකින් ඔවුන් හා එක්වෙන්නය කියලා ඕමානයේ ඇති ඔවුන්ගේ ශාඛාවේ ගෘහනිර්මාන ශිල්පියෙක් ලෙස...එම දුරකථන ඇමතුමේ බැක් ස්ටෝරි එක වෙනම ලියන්න ඕනි දෙයක් මොකෝ මෙතනට ඒ පොලිටික්ස් වලින් කිසිම වැඩක් වෙන්නේම නැති නිසා.....එය වෙනම ලියමි...!

එම දුරකථන ඇමතුම එන අවධිය වෙද්දි, හද්දා පිටිසර හැදීවැඩී, ජීවිතේ පළමුවෙනිම වතාවට විශ්ව විද්‍යාල ගමන නිසා කොළඹ පැමිනි මා, විජාතිකයෙකුට මුල්නමින් ඇමතීම දක්වා පරිණාමනය වී තිබුනා....

දුරකථන ඇමතුම දුන්නේ මාර්කො මල්පේඩි (Marco Malpiedi ), ඔහු එවකට COWI Consult (කොවි කන්සල්ට්) නමින් වු ඩෙන්මාර්ක් ඉංජිනේරු සමාගමේ නේවාසික කළමණාකරු ඕමානයේ...ඉතා සුහදශීලීව මා ඇමතු ඔහු, ඔවුන් හා එක්වන්නය කියා ඉල්ලුම් කළා...ඒ අවදිය වනවිට, මා එකතුවී සිටි ඕමානි සමාගම වැනි සමාගම් වල සේවය කරන්නන්ගේ එකම ප්‍රාර්ථනය ජාත්‍යන්තර සමාගමකට බැඳීමයි. එයට හේතු රාශින් විවිධයි..ඉහල වේතන, ඉහල පහසුකම් ආදියත්, සමාජමීය වශයෙන්  ආභරණයක් වූ සුද්දන්ට (ඉන්ටර්නැශනල් කොම්පැනියකට) වැඩකිරීමත් එයින් සමහරක් විය හැක.

ඩෙන්මාර්කයේ ලුන්ග්බි (Lyngby) නගරයේ කොවි (COWI) ප්‍රධාන කාර්‍යාලය

මාර්කෝ මාහට සම්මුඛ පරීක්ෂනයට එන්නට කියූ දා මා ඇත්තටම චකිතයෙන් යුතුවය ඔහු මුනගැසුනේ..එයට හේතුව සමහර විට ඒ මා සුදුජාතියෙකුගේ සම්මුඛ පරීක්ෂනයකට මුහුන්දුන් මුල් වතාව වීමත්, හදපිරුණු බලාපොරොත්තු ගොන්නත් අතර තරඟයක්ම වියයුතුයැයි දශක දෙකකට පසු අතීත ආවර්ජනයේ යෙදෙන මේ මොහොතේ හිතට එන හැඟීමය...!

මාර්කෝ මල්පේයිඩි (Marco Malpiedi)


අපි කථාවට නැවතත් යමු...!

හිතේ දෙගිඩියාවෙන් මෙන්ම හද පිරි අනාගත බලාපොරොත්තු ඉහලින්ම දරාගෙන කුරුම් හයිට්ස් (Qurum Hieghts) නැමැති මස්කට් ආසන්නයේ ඇති උප නගරයේ, ලෙබනන් ජාතික ගෘහනිර්මාන ශිල්පියෙකු නිර්මානය කල වෘතාකාර ජනේලයන්ගෙන් සැදි, තරමක් විවාදයට භාජනයවූ පල්ලියක් අද්දරින් පහලට නෙරා ඇති අතුපාරක තිබූ මහල් දෙකකින් යුත් නිවසක පවත්වාගෙන ගිය එම කාර්යාලය මගේ ජීවිතය අමුතුම මගකට හරවාවීයැයි යන්න මට හීනෙකින් වත් ආ හැඟීමක් නොවීය...!

මාර්කෝ මා සාදරයෙන් පිළිගත්තා පමනක් නොව ඉතාමත් ගරුසරු ඇතිව මාව මෙහෙව්වාය කීවොත් මා නිවරදියි...ආගිය කථාවලින් පසු ඔහු මාගේ පඩිනඩිද වාහනය සම්බන්ධවූ ගැටලුද විසඳා, පසෙක ඇති දුරකථනය ගෙන යමෙකුට ඔහු සහ මා සිටි ඔහුගේ කාර්‍යාලයට පැමිනෙන ලෙස දැන්වූවා අද මෙන් මාහට මතකය....!

දුරකථනයෙන් කථා කල තැනත්තා අමතා මාකෝ කීවේ " පීටර් ප්ලීස් කම් ටු මයි ඔෆිස්, අයි වෝන්ට් ටු ඉන්ට්‍රොඩියුස් යූ ටු අවර් නිව් ආර්කිටෙක්ට් " කියායි.

මා වාඩි වී සිටියේ මාකෝට මුහුන දෙමින් ඔහුගේ කන්තෝරු කාමරේ දොරට පිටුපා නිසා දුරකථනයෙන් අමතා කථා කෙරූ තැනත්තා දොර ලඟටම එනතුරු ම මා දැක්කේ නැහැ...හයි පීටර් ( හායි නෙවෙයි හොඳේ...ඩේනිෂ් අය හායි කියන්නේ හයි..කියලා...දෙපාරක් හයි හයි කියන්නේ ගුඩ්බායි කියන එකට ) කියා මාකෝගේ කටින් පිටවෙනකොටයි මා පිටුපස හැරී බැලුවේ...!

ගෝටියක් (ඒ කිව්වේ එළු  රැවුලක් ) තිබ්බ උස බ්‍රිතාන්‍ය ජාතිකයෙකු යැයි සිතිය හැකි මට වඩා වයස කෙනෙක් තමදෑත් දොර උලුවහු දෙකේ තියාන මා දිහා බලා..."සෝ යූ ආර් ලුකින්ග් ෆොර් වර්ක්.." යැයි කියනවාත් සමගම මා හැරී බැලුවේ මාකෝ ගේ නෙත් දිහා...ගිනියම් වු ඇස්දෙකින් පීටර් දිහා බැලූ මාකෝ ඉතාමත් බැගෑපත් මුහුනක් මට පෙන්නා නැවතත් පීටර් දිහා බලාගෙන.."නෝ පීටර්..හී ඊස් නොට් ලුකින් ෆොර් වර්ක්..වී ආර් ආස්කින්ග් හිම් ටු ජොයින් අස්..ජස්ට් ටේක් අ සීට් විල් යූ..."ය‍යි පවසා හිස දෙපැත්තට වනා මා දෙස සිනහ පිරි මුහුනකින් බලා තම අසුනේ හරි බැරි ගැහුනේ සුසුමකුත් හෙලමින්....!

මම කව්ද, දැනැට වැඩකරන ආයතනය කුමක්ද, දැනට මම එම ආයතනයේ ප්‍රධාන ගෘහනිර්මාන ශිල්පියාය ආදිය මාකෝ විසින් පීටර්ට තේරුම් කරද්දී මම කිව්වේ, මා දැනැට වැඩ කරනායතනයේ ගෘහ නිර්මාන ශිල්පීන් සිටින්නේ මම පමනක් නිසා මම ප්‍රධාන ගෘහ නිර්මාන ශිල්පියා බවයි. එය අප අතර තිබූ දෘඩ බව නැතිකරන්නට උදව්වක් උනා තිදෙනාම සිනහවෙන් එය පිළිගත් නිසා...එයින් පසු සෙන්නාගෙන් ගොන් ප්‍රශ්න අහන සංඛ සේ, පීටර් කිසිසේත් අදාල නැති ගොන් ප්‍රශ්න වැලක් අහන්නත්, මම ඒවාට කිසිම පැකිලීමක් නැතුව උත්තර දෙන්නටත් උනේ, ඒ වෙනකොටත් මාර්කෝ මා එම සමාගමට බඳවා ගැනීමේ මුල් කාර්යයන් හමාර කොට තිබූ නිසාවෙනි.


ඉන් සුමාන දෙක තුනකට පසු මම අලුත් ඔෆීසියේ වැඩට ගියේ අලුතෙන් ගත් මෝටර් රථයේ නැගී සෑහෙන සතුටකිනි. මා පිලිගත් අමරනාත් (ඔහු ගැන වෙනම ලියමි ) මාකෝ වෙත මා ගෙනගියේ සෑහෙන සතුටකිනි. එයට හේතුව අමරනාත් ගැන ලියනාවිට ලියවේවි.

මාකෝ මා රැගෙන ගොස් උඩ තට්ටුවේ වාඩි වී සිටි ඩෙන්මාක ජාතික ඉංජිනේරුවන්ටත්, ඕස්ට්‍රේලියානු ජාතික ගෘහනිර්මාන ශිල්පියෙකුවූ ඩග්ලස් ලෑන්ග්ද්මේඩ්, කේරළ ජාතිකයෙකු වූ ජේම්ස් ජෝන්ස් සහ ඉන්දියන් ජාතික ගෘහනිර්මාන ශිල්පිනියක් වු ස්වතී හල්දන්කර් සහ ශ්‍රී ලාංකික ගෘහනිර්මාන ශිල්පී මා මිත්‍ර සරත් බන්ඩාරයන් සහ අනෙකුත් සැලසුම් ශිල්පීන් හටත් හදුන්වා දුනි.

ඉහත කියූ සහෝදර කාර්‍යාල සඟයන් වාඩී වී සිටි අයුරු, ඔවුන්ගේ පුටු මේස තබා තියූ අයුරු මා කැළඹුවේ, මා කළින් වැඩ කල ස්ථානයේ මා හට වෙනම ඉඩක් ද කොම්පුයටරයක්, ඩ්‍රෝවින්ග් බෝර්ඩ් එකක්, ටෙලිෆෝනයක් යනාදිය ද තිබූ බැවිනි. ශ්‍රීලාංකික ගෘහනිර්මාන ශිල්පියා ඩ්‍රෝවින් බෝර්ඩ් එකකද, ඉංදියන් ගෘහ නිර්මාන ශිල්පිනිය කොම්පියුටර මේසයකද වාඩිවී සිටීමත්, ඕස්ට්‍රේලියානු සහ බ්‍රිතාන්‍ය ජාතික ගෘහ නිර්මාන ශිල්පීන් දෙදෙනා කුඩා කියුබිකල් දෙකක වාඩිවී සිටීමද මෙයට හේතුවයි.

හඳුන්වා දීම්වලින් පසු නැවතත් ස්පයිරල් ස්ටෙයාකේස් එකෙන් පහල ඇති මාකෝගේ කාමරයට පැමිනීමෙන් පසු, මෙම ආයතනයේ ප්‍රධාන ගෘහනිර්මාන ශිල්පී ඕලේ බී ලාසන් (Ole B Larsen) මහතා මාස තුනක නිවාඩුවකට ඩෙන්මාකයට ගොස් ඇති වගත්, මා ප්‍රධාන ගෘහ නිර්මාන ශිල්පියා ලෙස කලින් ආයතනයේ වැඩකරමින් සිටි නිසාත් ඕලේ ලාසන් මහතාගේ පහල ඇති කාමරයේ මට මුල් මාස තුන වැඩ කිරීමට අවසර ඇති බවත් මාකෝ පැවසුවේ මාගේ හිත තුල තිබූ අවිනිශ්චිත බව තේරුම් ගිය කෙනෙකු ලෙසයි.

ලාසන් මහතාගේ මේසය උඩ ඇති පෑන් පැන්සල් යනාදිය...!


ලාසන් මහත්තයගේ කාමරයට, (කාමරයක් කිව්වට ඒක අඩි හයක් පලල අඩි දොලහක් විතර දිග තීරුවක්, ස්පයිරල් ස්ටෙයාර් එක යටින් ඇතුල් වෙන්න තියෙන..කාමරේ මුලු දිගෙන් බාගයක් විතර වැහිලා තිබුනේ පැරලල් රූලකින් සමන්විත ඩ්‍රොවින් බෝර්ඩ් එකෙන්..ඒකට පැත්තකින් තිබිච්ච මේසේ පාට පාට පැන්සල් පෑන් වලින් පිරිච්ච ටින්, අනිකුත් ඇඳීමේ උපකරන වලින් ගහන හැබැයි සෑහෙන පිලිවෙලකට තියෙන තැනක් කියන එක මගේ ක්ෂනික අවධානයට යොමු උනා...) ම රැගෙන ගිය මාකෝ..ඔබට මේ කාමරය තාවකාලිකව මාස තුනක් පාවිච්චි කරන්න පුලුවන් ඔහු එනතුරු, නමුත් මෙම කාමරය අතහැර යාමේදී, කාමරයේ ඇති දෑ මේ තියෙනාකාරයටම නැවත තැබීම ඉතාම වැදගත් බවත්, ලාසන් මහතා වෙන කිසිම අයෙකුට ඔහුගේ ආම්පන්න පාවිච්චියට නොදෙන බවත් පැවසුවා....!

අර්වින් හක්‍රොව් (Ervin Haukrogh)

ඔහු නික්ම ගිය පසු වට පිට හොඳින් පිරික්සා බලා මා පුටුවේ හරිබරි ගැසී වාඩිවෙනවාත් සමගම, ඉතාම ප්‍රියංකර සිනහවකින් නිතරම මුහුන පුරවාගෙන සිටින හීන්දෑරී ඩෙන්මාර්ක් ජාතික ඉංජිනේරුවකු වූ අර්වින් හක්‍රොව් (Ervin Haukrogh) කාමරයට ඇතුල්වුනේ ලිපිගොනුවකුත් ඩ්‍රෝවින් රෝලකුත් සමගින්...කොවි කන්සල්ට් සමාගමේ මගේ පළමුවෙනි ව්‍යාපෘතිය ආරම්භකිරීමට කාලය පැමිනි ඇතිබවත්, මා හට එදා සිට මාස තුනක කාලයක් ඒ සඳහා වෙන්කොට ඇති බවත්, එම ව්‍යාපෘතියේ ව්‍යාපෘති කළමනාකරු ඔහු බවත් ඉතාමත් කුළුපගුව පවසා, ඕස්ට්‍රේලියානු ජාතික ගෘහනිර්මාන ශිල්පියාගෙන් එම ව්‍යාපෘතිය මා හට බාරගන්නා ලෙසත් පවසා, ලිපි ගොනුව මා වෙත තබා ඕනෑම අවස්ථාවක ඔහුව සම්බන්ධ කරගන්නයැයි ටෙලිෆෝනය වෙත ඇඟිල්ල යොමු කොට අර්වින් පිටව ගියා...!

ඉදිරි මාස තුන, ස්ථාන මාරුව සහ ස්වතී හල්දන්කර් ගැන ඊලඟට ලියන්නයි ඉන්නේ...!

ප.ලි. :
මෙය ලියා තැබීමට හේතුපාද වූයේ, ඉහත මා සඳහන් කල, කොවි සමාගමේදී මුලින්ම මුනගැසුනු, මා මිත්‍ර බ්‍රිතාන්‍ය ජාතික පීටර් සැමන්ස් රුදුරු හෘදයාබාදයකට ගොදුරුවී අප සැමගෙන් සමුගත්තායැයි ලැබුන ඊමේලය කියවීමෙන් මා සිත දශක දෙකකටත් එහා අතීතයට දිව යෑමය...! 
මේ දිග කථාව ලිවීමට මට හයිය හත්තිය ලැබේවා යයි පතන්න ඕනි ඉතින්...!

ඔය වෙනම ලියමි, පන්නරය-2 වගේ ඒවා ගැන නම් මගේ කිසිම විශ්වාසයක් ඇත්තේම නැත...!







Monday, 27 March 2017

සුපිපි පියුම

නෙළුම
ශිව පාර්වතී


විකසිත වූ නෙළුමක් ලෙසැ
දියමත දිදුලන
ආඩම්බරෙයෙන්මැ දිදුලන

පිබිදී හැකිලෙන
හැකිලී පිබිදෙන
ඒ හැම
වාරයක් පාසාම
දියෙහි ගිලී
යලි මතුපිට සරනා
ආඩම්බරයෙන්මැ සරනා
නෙළුමක අසිරිය
ඔබැ රුව පැරදුවේ
සදොස් හැගුමන්ම නොව

මානසවිල  මත නොපිපෙන
නෙළුමක අසිරිය සෙවූ
අවිහිංසක හැඟුමක්ම බැව්
පවසමි සෙනේහෙන්..




Wednesday, 15 March 2017

බෝසත්




සිරකරු මා
මැදිරියක
වීදුරු
බෝසත් කම මා
වසනු බෑ ඒ
මැදිරියට
වීදුරු

කළු මා
සුදු ඔබ 
දෑත
කැමැත්තෙන්ම නොවෙදෝ
අතහැරියේ
සංසාර බියට

මෙතුවක් කල්
අප ගැටී නොසිටියෙමුද
අප දෑත් වෙලී නොතිබුනෙද 
රුකකට පෙම් බැඳි
ලියවැලක් මෙන්...?


බිඳගත්තේ ඇයි ඔබ
බෝසත් ගුන කන්දරාවක්
තනි සතුටක
එල්ලී අහම්බෙන්

හමුනොවෙමු
කිසිදා ආයෙත්
මතු උපදින ආත්මයක් 
ආත්මයක් පුරා...

පාරමිථා නොව මා
මේ පුරන්නේ
ගැලවීමමයි
ඒ පුහුදුන් බැඳුමෙන්...

සොඳුරියේ මතු උපදින
ආත්මයේ...!





මීවිත 
මියැසිය
තනිරකීවි
බෝසත් හට....!














Tuesday, 14 March 2017

බාල අපරාධයක නුඹ මාව කොටුකරලා



එල්ලෙන්න වැල් නැතිඋනාට
ගහ පුරාම වැල ඉදිලා

හෙව්වේ බැලුවෙ නැත්තේ
නුඹ තාම පොඩි නිසා

හිතේ දොලදුක නැත්තෙ
අඹගහේ ගැට පිරිලා

මාස පහෙන් ගැබ් ගත්තේ
නොදැනීම වැට පැනිලා

බාල අපරාධයක 
නුඹ මාව කොටුකරලා

තණපිස්සේ දුවන්නෙපා
මේසෙන් පනින්නෙපා

පුරු පුරු ගගා දැවටෙන්නෙපා
පෑගුනොත් මම පව්කාරයා

එල්ලෙන්න වැල් නැතිඋනාට
ගහ පුරාම වැල ඉදිලා

බාල අපරාධයක 
නුඹ මාව කොටුකරලා





Wednesday, 8 March 2017

අවසරයි....!!







Baby smiling up at her mother impressionism Mothers children by  Mary Cassatt


අතක්
පයක්
ඇසක්
කණක්

ගෙයක්
දොරක්
ගහක්
කොළක්

නොව මා
දන නවාන
දෑස් වසාන
යදින්නේ

අවසරයි
මා 
යදින්නේ

තව එකම එක
සීතල රැයක්
ඔබතුරුලේ
නිදන්න ආයෙත්

තව එකම
එක වතාවක්
සියුමැලි ඔබ දෙතොලින්
සිඹගන්න
ආදරෙන්
ආඩම්බරෙන්
රැලි නැගෙනා
පටු
නළල් තලය
මගේ





Sunday, 5 March 2017

ක්ලිප්ස්....!






කැමරා සිත්තම සඳූගේ සත්තලං ගේ....!

තදට තදේ
දිගට දිගේ
වෙලුන දඟේ
රැහැන්පොටේ
කිටිකිටියේ
වෙලුන දඟේ
වෙනකෙකුගේ
දෑඟිලිවලට
තදට තදේ
                   මිරිකෙනවානං
                                         අනේ අපි දෙන්නාවම
                                         එකටම මිරිකෙන්නට
          පතමු අහස බලාන
පොඩ්ඩිගේ සුදු නිල්කැට
බේබි සුවඳ ජංගිකොට ටික
ගෙනෙනකන්
ඈ.....!

Saturday, 4 March 2017

හෙඩිමක්..කෝ...?

අබිජා ආබිජා
කමියා..කාමීයා
පැන්නා ..පැන්නා
වතුරට..
දිල් රුබා..
පූල් එක ඉතිරුවා..
මේ වෙනතුරු රහසක් වීලා
මා සිතේ යම් දෙයක් තිබුනා..
Mash up...oops
ඔතනින් ඉවරනන්
ටක් ගාලා ඇඳගනින් ඇඳුම් ආ..
ඒ මාතා...කවුද කවුරුද...
මාතලන් මෙයා...ඔව්..
පොකුරුට නොතේරුනාට
නොදැමුවාට කොමෙන්ට් පොකුරු...
විසිරිට තේරේවි...
ලොකුපුතාගේ
පිස්සු ඩොකාගෙ
ඇයි අපේ අටම් අයියාගේ
සතුටට
බාධාවක් වේවිද
මොනාවත්...
අපේ...

ඔබේ...

නිදහසට
හානියක්..


ඔයුරින් ඔයිරේ...

අද හමුවෙමුද අපි..
හෙට හමු වෙමුද අපි...



Thursday, 23 February 2017

කරනවද ආදරේ මටත්...!






මම උස ගියොත්
මගේ අත දිග උනොත්
කඩා දෙන්නම්
පහල ගහෙන් වෙරළු ගෙඩියක්වත්


මට තේරුනොත්
මම ලියාගත්තොත්
මම කියෙව්වොත්
කියා දෙන්නං පාඩමක්වත්


මම හිටගත්තොත්
ඔබට නැගිටින්න 
ඇහැකි මට කරන්න
උදව්වක්වත්


මම හොයාගත්තොත්
බෙදාගන්න ඇහැකි
අඩුමගානේ
කැමක් බීමක් වත්


මම හිතුවොත්
මට දැනුනොත්
කියාදෙන්න ඇහැකි
ඔවදනක්වත්


ඒත්...!
මම ආදරේ කලොත්
කරනවද ආදරේ
 මටත්...!


Saturday, 18 February 2017

හුටා..සුද්දා අදත් වහලා බං....!



මම දකුනට පෙම් බැන්දේ බොහෝම ඉස්සර..ඒක දිග කථාවක් උනත් ටික ටික එහේ මෙහේ ලිව්වා...!

කොහොමෙන් කොහොම හරි දැන් වෙනකොට මම මගේ ජීවිතේ බෙදාගෙන දවස ගෙවන කෙනෙක්, ඒ කියන්නේ මම දෙබිඩ්ඩෙක්, දෙබිඩ්ඩෙක් කිව්වට ඩුවල් සිටිෂන්ශිප් එහෙම ගත්ත අය වගේ දෙබිඩ්ඩෙක් නෙවෙයි, ඩුවැලිටි එකේ ජීවත්වෙන කෙනෙක් සාර්ථක විදියට, ඒ කිව්වේ වටපිටාව, පවුල්, වෘත්තිය අරවා මේවා අවුල් නොකරගෙන , ජීවත්වෙන දෙබිඩ්ඩෙක්....!

සාර්ථක වෙන්න හේතුව මට ඇඩ්ඩ්‍රස් නැති කම, මම ඉපදුනේ අම්පාරේ සෙන්ට්‍රල් කෑම්ප් එකේලු, ඉස්කෝලම ගොඩකට ගියාලු, රටවල් තුන හතරක ජීවත් උනාලු, ඉතින් ඇරියස් අඩුයි...දේවල් බෙදාහදාගෙන ජීවත් වෙන්න ඇති වෙන්න පන්නරය හම්බෙලා තියෙන්නේ මේක කියවන ඔබලා වගේ දේවල් දන්න අයගෙන්...! ඉතින් අවුල් අඩුයි...!

වර්තමානය කියල දෙයක් තියෙනෙවනේ..අන්න ඒකේ මම දෙබිඩ්ඩෙක් වෙන්නේ මගේ කාලය 60%-40% ප්‍රතිශථයට ( ස්පෙලින්ග් වැරදියි මම හිතන්නේ..) නගරයයි ගමයි අතරේ බෙදාහදාගෙන ජීවත් වෙන නිසා..අහන්න එපා ඕන් හැට මොකක්ද, හතලිහ මොකක්ද කියලා අපේ ලොකු අම්මාවත් දන්නේ නෑ ඒක හොඳේ...!

ඒ උනාට මේ වෙලාවෙ නම් මම ඉන්නේ ගමේ..ඒ කියන්නේ දකුනේ..හැබැයි මේ මගේ ඉපදුන ගම නෙවෙයි (විසිරි ඇහුවා එක දවසක් එහෙම..තව නූලෙන් ඉන්ජෙක්ශන් ගහනවා ඒ ඇත්තී මට..මම හරි බයයි ඔය කටු වලට..අපි ඉබ්බොන්ට හරි ලව් හරිය..)

හරි ගමට එමු...මාතරින් කතරගම පැත්තට යනකොට, දෙවුන්දර, ගන්දර, තලල්ල, හුන්නදෙනිය, බතීගම එහෙම පහුකොලාම එනවා ඔය අපි කොළඹ ඉඳන් ගාලු පාර කියන එක දෙකට බෙදෙන නගරයට..ඇත්තටම...පාරම්පරිකව අපේ ඇත්තෝ කතරගං ගියේ ඒ අපි කියන ගාලු පාර , ඒ කියන්නේ මුහුද අද්දරින් කතරගම පැත්තට ඇදෙන පාරේ ඔය කිව්ව නගරෙන් ඒ කියන්නේ දික්වැල්ලෙන් හැරිලා බෙලිඅත්ත හරහා තංගල්ලට ගොහින්.

දික්වැල්ල ටවුම මැදින්  වමට හැරුනාම යෝනකපුර මැදින් වැවුරුකන්නල හරහා වලස්ගලින් දකුනට ගියාම බෙලිඅත්ත, එතනින් වමට හැරුනාම රදම්පොල...ඒත් දැන් මහවෙල පාර හදලා දික්වැල්ල පහුකොරාන ප්‍රයිවට් බස්නං යන්නේ ගොඩාක් වෙලාවට මහවෙල පාරේ තංගල්ල පැත්තට, ඒ උනාට තාමත් සීටීබී බස් නං යෝනකපුර අස්සෙන් බෙලිඅත්ත හරහා තමා ඉතින් තංගලු යන්නේ..!

ඉතින් මේ දික්වැල්ලට මම පෙම් බැන්දා 2001දී......!

ඒ සෙනෙහස ආත්ම ගානක් පතාගෙන ආ බැඳීමක්..ඒත් ඒ ඇත්ති දැන් දිව්‍යලෝකේ ඉඳන් මම කරන කියන ඔක්කොම බලාගෙන ඉන්නවා..ඒ ඇත්ති එලොව ගියේ මට ජීවිතයක් දීලා..ඒවා යුතුකං කියලයි මට කියල දුන්නේ එතුමිය ඉතින්...අහනව එහෙම නෙවි ඕන් ඒ කවුද බොලේ කියාලා...ඒවා බොහෝම ප්‍රයිවට් ඉන්ෆොර්...! ( පස්සේ කියන්නං අනේ..ඒක වෙනම පෝස්ට් එකක් ඉතින්..)

ඔය දික්වැල්ලේ තියෙනව හරිම ලස්සන පැත්තක් ඌරුගමුව කියල (මටම හරියන පැත්ත )..මම මගේ හැටේ හතලිහේ දෙබිඩි ජීවිතේ ගෙවන්නේ ඔන්න ඔය කියන ඌරුගමුව වසමේ..දන්දෙනියේ..හැබැයි ලුණු ගන්න හරි සිදාදියට, ඒ කියන්නේ දික්වැල්ලට එන්න එපැයි..ලුණු නෙවෙයි අනේ අර ෆුඩ්සිටි එකේ අයිනක තියෙන චූටි කවුන්ටරේ...රසම රස ලස්සනම ලස්සන බෝතලවල දාලා කෑන් වල දාලා (අයියූ අපිනම් ඔය කෑන් එක්ක නෑ හොඳේ..) තියෙන එව්වා ගන්න හැමදාම පුරුද්දට, අර මොණරු මගේ පැපොල් වගාවට උදේම ලෑන්ඩ් කරනවා වගේ, මමයි අටම් අයියයි සරායි (ආ අටම් අයියත් දැන් දෙබිඩ්ඩෙක්..හෙට අනිද්දා තවත් එක්කෙනෙක් එනවා... එයාට අපි එයාමකන්ඩිෂන් කරපු කාමර කෑල්ලක් ගහනවා මේ දවස්වල..) යනවා ඉතින්...!

අපි හරි පිළිවෙලට ජීවත්වෙන දෙබිඩ්ඩෝ..ඒ කියන්නේ හැම දේම ප්ලෑන් කරනවා..එහෙම නැතුව දෙබිඩ්ඩෝ නෑ නෑ ගොවියෝ වෙන්න බෑ මෙයා...ඉතින් අපි හැම හවසම, ඒ කියන්නේ උදේ ඉඳන් පොලොව ගහකොළ එක්ක හැප්පිලා, ගහකොළ කියන්නේ, පොල්, ගම්මිරිස්, කුරුඳු, අඹ, පැපොල්, දොඩම්, බුලත් යනාදී ගහකොළ හොඳේ...සෑට මොනාද කරන්නේ කියන එක එහෙම මාස්ටර් ප්ලෑන් ගහලා එහෙම තමයි ලේස්ති වෙන්නේ...ෆුඩ් සිටිය නම් හැමදාම (පෝය ඇරෙන්න ) අපි වෙනුවෙන් අපි වගේ එකට ඉන්නවා..ඒ උනාට මේ සුද්දා...හුහ්....!

මෙහෙමයි..දික්වැල්ලේ වැඩියෙන්ම ඉන්නේ ෆුඩ්සිටි සුද්දෝ.ඒත් මේ... ඒ සුද්දොන්ගෙන් එකෙක් නෙවී...අපේ සුදු මල්ලි...දික්වැල්ල හංදියේ ඉන්න අතිසාර්ථක ව්‍යාපාරිකයා...සුදු මල්ලියා..ඔය පහල පින්තූරේ ඉන්නේ..අන්න එයා..! 

බලන්නකෝ ඉතින්...!





එයා තමයි අපිට උපරිම සහයෝගය (ඒ කිව්වේ හැන්දෑව සොඳුරුම ආකාරයකට ගෙවීමට ) දෙන කෙනා..ඒ උනාට එයාට ඕනි දවසට විතරමයිනේ එයා බිස්නස් ඒක කොරන්නේ...!

අපේ මාස්ටර් ප්ලෑන් ඔක්කොම සුනුවිසුනු කරනවා මේකා...හැබැයි දෙයියනේ කියලා මෑන්ස් හිටිය දවසට අපි දිව්‍යලෝක සැප ලබන්නේ..(හැලපයියට ඉරිසියා වෙන්න ඕනි ඕන් දැන්..) ....!


මෙතනින් එහා ලියනවා වෙනුවට, ඔය පහල තියෙන පින්තූර ටික බලන්නකෝ..එතකොට තේරුම් ගනීවි හැමෝම මොකෝ මම (මම විතරක්ම නෙවෙයි අටම් අය්යා, සරා..ලඟදීම තවත් අතිසාර්ථක ජීවියෙක්) ඇයි මේ අහිංසක දකුනේ හැංගිච්ච ගමකට මෙච්චර සෙනෙහේ බැන්දේ කියලා...!

ඒකක් රුපියල් 20 යි මේ පැටිස්...!


රුපියල් හයේ වඩේ...ඊට එහායින් තියෙන ඒවා මාරයි...!
සුදුමල්ලියාගේ නෝනා වගේ චිකන් බදින්න අපිට නම් බෑය..!

බයිට් සෙට් එක හදනකං කෑමට සුදුමල්ලියාගේ නෝනාගේ පාන් ටෝස්ට් සහ කට්ලට්ස්...!

බොස් මොනාද බයිට් එකට දාන්නේ...?

ආ..සුදු මල්ලි..මට චිකන් කෑලි හතරක් කපලා, පැටිස් හයක් කපලා හදලා දෙන්න..ආ කඩල ටිකකුත්..පනහක වගේ හොඳේ...

බොස් දැල්ලෝ දාන්නද දෙකක් තුනක්....

හා...!



බොස්..කෑමට...?

ඉඳිආප්ප දාන්න සුදුමල්ලි...!

බොස්ටත් එක්ක නේද....?

ඔව්....!

කී දෙනෙකුටද බොස්...

මාත් එක්ක දෙන්නයි මල්ලි..!




බොස් හැත්තෑවක් දාන්නං...(ඒ සුදු මල්ලිගේ නෝනා...)



බොස් පරිප්පු හොදි වලට චිකන් හොදි ටිකක් දාන්නං හොඳේ,,,...!

හා.....!

බොස්...බයිට් එක උනුයි..වත්තට ගිය ගමන් පාර්සලේ අරින්න හොඳේ.....!

අපේ ලොකු අම්මාවත් මේච්චර ලවෙන් කෑමක් දිලා නෑ ඕයි...!

ඉතින් කොහොමෙයි දන්දෙනිය දාලා යන්නේ.....!


නැද්ද හැලපේ...!




නැද්ද ...?


ප.ලි..: ලොකු අම්මා කෙනෙක් ගැන මම තාමත් හීන මවමි...ඇය මට හමුවී ඇත..රසම රස කැම වේල් උයාගෙන මා එනකන් ඈ කොවිල් යන්නත් එක්ක කොච්චරනං ඇවිත් ඇද්ද අප්පා...හීනයක්ම උනා නොව මගේ ලොකු අම්මා...!







Friday, 17 February 2017

හැලප එක්ක කොච්චි



1020 Way 2118


හැලප එක්ක 
කන්න ඇහැක්ද 
කොච්චි....!

හ්ම්......!

කොච්චි එක්කවත් 
කන්න ඇහැක්ද
හැලප...!

ඒත්..!

කාපු කෙනක් 
කිව්වොත්
හැලප එක්ක 
කැවා කියාලා
කොච්චි..!
කීයෙන් කී දෙනාද අප්පා
කොරන්නේ 
විශ්වාස...!!

රසම රසයි
අනර්ගයි
රස නහර පිනායයි
හේතුව...!

කිව්වත් විශ්වාස කොරයිද
කවුරුවත්..
ඒත් ...!
ඇත්තම
ඇත්තයි..!
සැටිෆිකේට්ම
ඇත්තයි..!
රසම රසයි
අනර්ගයි
රස නහර පිනායයි...!
පහුගිය සතියෙම
වින්දෙමි
විඳෙව්වෙමි..
ඒත්..!
ඇත්තම
ඇත්තයි
සැටිෆිකේට්ම
ඇත්තයි..
රසම රසයි
අනර්ගයි
රස නහර පිනායයි...!

හැලප හැදන්නේ කුරක්කන් පිටිවලින්නේද...?
ඒ උනාට යොදියේ...
හප්පේ කොච්චි වල තියෙන රාජකීය උශ්නේ....!
ඉස්කෝලෙ ගැන නෙවෙයි උනත්..!
සෙන්ට්‍රිග්‍රෙඩ් විස්සකදි උනත්..
දැනෙනවා නෙව රාජකීය උශ්නේ..!
කොහොමද දන්නවැයි..!
කොච්චියා සිංදු කියනකොට
අර රාජකීය මාතලන් වගේමයි නොව...!

බ්ලොග් ලියන අපේ කරුමේ කියන්නේ
අඩුම ගානේ හාමිනාගේ කොන්ද හරි සෙට් වෙනාවනේ
ඔය ඩොමෙස්ටික් සෙන්සර්ශිප් එකට..
නැද්ද කොච්චි..
හා..
නැද්ද 
හෑලපේ...!


ආයෙත් දොහක
හැලප සමග
කන්න
කොච්චි
පෙරන පෙරුම්
අනේ මේ අහිංසක ටිං ටිං...!
බොක්කෙන්ම
තැන්කූ වේවා බොලාට...!

SQU Cultural Centre





Friday, 3 February 2017

ආ...බාන්න......!




යටියන
හක්මන
කිරින්ද
කඹුරුපිටිය

මුරුතෙන් ගිහින්
පුහුල්වැල්ල පහු කොලාම
වම් පැත්තට යටියන
දකුනු පැත්තට කිරින්ද

යටියන පහුකොරාන ගිහින්
වෙලේ බේකරිය පහු වෙනවත් එක්කම
හැරුනාම දකුනට
සං ගාලා ගියෑකි
කඹුරුපිටියට

ඔය කොහේ ගියත්
එකම තොග මුදලාලි හැම තැනම
එයාගේ බෝර්ඩ් එක දාලා
එකතු කරනව නෙව
ගම්මිරිස්, කුරුඳු, කරුංකා, ගොරකා
සමග
පොල් කටු ඇඟුරු...!
ඒ මදිවට
ඩයමන්ඩ් රෝලෙන් තලලා
දුන් ගහපු සබර ශීට්...!


මතක ඇති කාලෙකින් 
වීදුරු පාත් කොරන්
ඒ සී ඕෆ් කරන්
වම් පැත්තේ ගස් 
දකුනු පැත්තේ ගස් එක්ක 
එකතු වෙලා හදන හෙවනේ
යන්න තරං
පින් කලේ කොහොමෙයි මම

ඒත් වැඩක් නෑ අර දූෂිත පාලකයා
මේ ලස්සන පරිසරය හරහා
පාරක් රේල්
ඒ මදිවට හයි වේ එකක්
හදනව නෙව තාමත්
එලෙව්වයි කිව්වට
පැන්ෂන් ඇරියයි කිව්වට
'බොරු වෙන්ටෑ
නැත්තං කොහෙමෙයි
මේ ලස්සන පරිසරේ
චීන්නු ඇවිදින්නේ උන්ගේ
අම්මගේ බූදලේ වගේ
ඒ මදිවට ඉංදියන් කාරයොන්ගෙ ටාටා
පාර පුරා
අයින් කොලොත් හෙලේ..!

මොනාද මහත්තයෝ...!

ඒ තොග කඩේ මුදලාලි...!

ගම්මිරිස්....!

ආ...බාන්න......!



Wednesday, 1 February 2017

කඩමු අපි ගම්මිරිස්







අමරා ප්‍රේමා ශාන්ති
 සමග
වීරකැටියේ අක්කා
දනේශ් සමග පියංගිකා
ඉනිමං තිය තිය
පෝර උර එල්ලාන
කඩමු අපි ගම්මිරිස්




වීදියේ කඩෙන් ගෙනා
දොලහේ පාලහේ ටෙන්ට් රෙද්දට
බිච්චිය අල්ලන්
විලුඹ පැලුනු කෙසඟ කකුල්
එක්ක පොර බැන්ද කරල් ගම්මිරිස්
ඇටේ ඇටේ ගොඩ ගහන්
වැහි ඇඳුරට ඔච්චං කරනා
ඉලංදාරී හැඟුමෙන්
වේලමු ගම්මිරිස්




කිරින්දේ තොග මුදලාලිට
කිලෝව එක්දාස් එකසීයට
මහත්තයා දුන්නට
අමරා ප්‍රේමා සමග වීරකැටියේ අක්කාට
දනේශ් පියංගිකාට
දවසටම කුලිය 
හයසියයි උනකොට

හංදියේ දොස්තර මහත්තයා
සයිටම්ද නැත්තං මහත්තයාගේ
ලොකු බේබී වගේ ඒරොප්පෙන්ද
දොස්තර විභාගේ කොලේ කියනෙක 
කොන්දේ අමාරුවට 
මොනා හරි පෙත්තක් බාම් එකක්
දෙනවනං




මොකටෙයි  බං අපිට....!!!

Tuesday, 31 January 2017

පිස්සෙක් කුස්සියේ


art credit to a-twisted-mind


හෙට දෙකට පලලා
හුළං විස්කෝතු දෙකක් වෙන්න තියෙන
පොඩි බනිසක් අද කෑවාම 

වගේද

වරකා වෙලා ගස් යට වැටෙන්න කලියෙන්
අතින්ම කඩාගෙන හදාගත්ත
පොළොස් ඇඹුල....?

පොඩි ඈයෝ
සෙල්ලම් කඩ දාලා මස් වලට ගන්න කළියෙන්
ඉස්සො ටිකක් දාලා තෙල් දාලා ගත්තම
මොනා වෙනවද කෙහෙල් මුවකට...?

අච්චාරු දානවද මාලුවට උයනවද
රට අඹ තියෙද්දි
කර්තකොළම්බන්...!

ගොටුකොළ දිහා බලාගෙන
මොකට හදනවද සම්බලක්
මිටියකින් මුකුනුවැන්න...!

ෆුඩ්සිටියේ තියෙද්දි ලාබෙට දෙහි
ඇයි වදේ හදන්න කියන්නේ ලුනු දෙහි...!

රෝස පාටට හීනියට දිගට
ඉව්වම සුවඳ හමන අපේ කුඹුරේ වී කොටාපු හාල්
ඇයි වදේ පරදින්නේ 139ක් දීලා ගේන කීරිසම්බාවලට....!

Monday, 23 January 2017

වෙන්වීම..!

එක කෙනියක පීදුන කරාබුනැටි තුනක්.......!


පිරූ පෙරුම්
අයියනායක දෙවි පාමුල..!

පිදූ සල්මල්
වැව් තාවුල..!

කෙකටිය මල් තලාන
අප තිදෙන රැඟූ ආලිංගන
දියකාවුන් රැගෙන ගිය
 සොරාගෙන 

ඒ සොඳූරු මතකය

මතුබවයේ
එක අත්තක හෝ පීදී
එකට මියෙන්න
පැතූ පැතුමන


එක අත්තක රටාවකට
එක මොහොතක ඉපදුන

අප තිදෙන රැවටූ

අප දෙදෙන තනිකලා වූ

ඔබ
 පමනක් තනිව පිපී
අපට කලින්
සුළඟේ ගිලිහී පාවී යන්නට
ඔබැ රේනු
 තැලූ

බඹරානෙනි
 ඇයි රුදුරු
 මෙතරම්...!








Saturday, 21 January 2017

චන්ද්‍රිකා


I tell myself I don't need anyone but the truth is, they don't need me.

හතේ පන්තියේ ඉන්නකොට
හැන්දෑවට රබර් ගස් වලින් මුවා නොවුන
තරු පිරිච්ච අහස දිහා
ගේට්ටු කනු දෙක ගාව බෙල්ල උලුක් වෙනකන්
උඩ බලාගෙන චන්ද්‍රිකාවක් අහසේ යනකොට
කොච්චර කෑ ගහලා කිව්වත්
ගෙදර හිටි කිසිකෙනෙක් නාව වෙලාවෙවත්
නොතේරිච්ච ඇත්ත....!

හිතේ ඇඳිච්ච ඔක්කොම වගේ හීන හැබවින්ම සැබෑවෙච්ච
අද දවසෙදිවත්
තනියම අර අහසේ පාවෙන ඒ තිතක්වන් එළිය
පෙන්නන්න ඇයි කවුරුවක්වත් නැත්තේ...!

කෑ ගහලා කිව්වත් ඇහෙනතෙක් මානෙක කිසිවෙක් නැති
මේ අඳුරු රාත්‍රියේ
තනිවම ඔබ පසුපස යමි
ලොව වටා රවුමක් ගොස් නැවතත්
මා සොයා එනතුරු...!

තනිතරුවක් නොවී ඔබ
චන්ද්‍රිකාවක්ම
වීමයි තනි ඇත්ත...!

Thursday, 19 January 2017

අවසර මා හට...!


abandon- two lesbian friends - a painting by French Painter Henri De Toulouse-Lautrec



ඔබ මා වෙන් කල
සයුර මැව්වේ අපමද
මොහොතින් මොහොත මාහට
ආදරයේ විස පෙව්වේ ඔබමද !

දුරබනුව විතරමද
අප ලංකලේ නෑ නොවේද...?
මා ඔබ දකින්නේ
යතාර්ථයේම
නොවන්නේ නම්
කෙසේ අප එක්වෙම්ද 
මේ භවයේ සොඳුරිය...!

ඉසුරු යැයි හිතා
අප ලංවූ මොහොතක්
සදාකාලිකයැයි සේ ඇයි මා සිතුවේ 
දැනෙනා තුරු මා සිතට
අප දෙදෙන එකෙකුම වීම හීනයක්ම වෙන තුරු !

සැමදා පතනෙමි
මේ සෙනෙහසේ අවසානය
ඔබ මා දෙදෙනෙකු නොව
ඔබද මා වී මාද ඔබම වී
දිගෑලෙන කවියක පදවැල් සේ
රිද්මයෙන් ඇසේවි යැයි
පතනෙමි සොඳුරිය,,,!

අවසර මා හට
රිසිසේ විඳිනට
දෝරේ ගලනා
ඔබ සෙනෙහස් නදියේ 
උඩුගම් බලා පිහිනා
ගිලී මියෙන්නට...!

අවසර මා හට...!



Inspired by Lyrics of Oceans Apart - Richard Marx
We all have a sexual orientation and a gender identity, and this shared fact means that discrimination against members of the Lesbian, Gay, Bisexual and Transgender (LGBT) community, based on sexual orientation and/ or gender identity, is an issue that transcends that community and affects all of us.